ജാതിയില് ജല ദൗര്ലഭ്യത്തിന്റെ ആദ്യ ലക്ഷണമായ കായ് ചുങ്ങല്/കായ വാടിവീഴുക എന്നീ ലക്ഷണങ്ങള് കാണുന്ന ഘട്ടത്തില് ജലസേചനം അത്യന്താപേക്ഷിതമാണ്. ജാതിയുടെ ചുവട്ടില് പുതയിടല് നിര്ബന്ധമായും അനുവര്ത്തിക്കുക. സള്ഫേറ്റ് ഓഫ് പൊട്ടാഷ് 5 ഗ്രാം ഒരു ലിറ്റര് വെളളത്തില് എന്ന തോതില് തളിച്ചുകൊടുക്കുന്നത് വരള്ച്ചയെ പ്രതിരോധിക്കാന് ഒരു പരിധി വരെ സഹായിക്കുന്നു. വേനല്ക്കാലത്തു ജാതിയില് ഉണ്ടാകുന്ന പ്രധാന രോഗങ്ങള് കായ് കൊഴിച്ചിലും, കൊമ്പുണക്കവും, കരിപ്പൂപ്പ് രോഗവുമാണ്. അവയ്ക്കായുളള സംയോജിത നിയന്ത്രണ മാര്ഗങ്ങള് ഇനി പറയുന്നു. രോഗം ബാധിച്ച ഇലകളും കായ്കളും നശിപ്പിക്കുകയും ഉണങ്ങിയ കൊമ്പുകള് വെട്ടി നശിപ്പിക്കുകയും ചെയ്ത്, തോട്ടത്തില് മുഴുവനായും ശുചിത്വം പാലിക്കുക. ജാതിയില് കായ് പിടുത്തം കുട്ടുന്നതിനും, കായ് കൊഴിച്ചില് തടയുന്നതിനും, കുമിള് രോഗബാധ നിയന്ത്രിക്കുന്നതിനും സ്യൂഡോമോണാസ് ഫ്ളൂറസന്സ് 20 ഗ്രാം ഒരു ലിറ്റര് വീര്യത്തില് കായ്പിടുത്ത സമയത്ത് തളിച്ചുകൊടുക്കുക. 20 ഗ്രാം ചാണകം ഒരു ലിറ്റര് വെളളത്തില് കലക്കിയ ലായനിയുടെ തെളിയില് 20 ഗ്രാം സ്യൂഡോമോണാസ് ചേര്ത്ത് തളിയ്ക്കുന്നത് കൂടുതല് ഫലപ്രദമാണ്. പൊട്ടാഷ് കുറവിന്റെ ലക്ഷണം കാണിക്കുന്ന മരങ്ങളില് കൃത്യമായി വളപ്രയോഗം നടത്തുക. കരിംപൂപ്പ് രോഗങ്ങള് കാണുന്ന ഇലകളില് കഞ്ഞിവെളളം തളിക്കുക.
Leave a Reply